Toyota компанияси Uber’га инвестиция киритади

Toyota ва Uber компаниялари ҳамкорлик қилишни бошлаганини эълон қилди. Томонлар “англашув меморандуми”ни имзолаган бўлиб, унга кўра, Япония компанияси АҚШнинг такси-сервисига сармоя киритади.

Инвестициялар ҳажми ошкор этилмаяпти. Ҳамкорликдаги фаолиятнинг асосий йўналишларидан бири лизинг бўлади. “Тойота” ўз машиналарини фойдали шартлар асосида узоқ муддатга, кейинчалик сотиб олиш шарти билан Uber ҳайдовчиларига ижарага беришга тайёр. Бундан ташқари, томонлар қўшма мобил дастур ишлаб чиқармоқчи.

2016 йилнинг баҳорида Volvo, Ford, Google ва Uber “автопилот коалицияси”га бирлашган эди. Self-Driving Coalition for Safer Streets иттифоқи автоном бошқарув тизимига эга машиналарни оммалаштириш билан шуғулланади.

Шунингдек, Uber АҚШнинг Parkmerced девелоперлик фирмаси билан ҳам келишув имзолаган бўлиб, қурувчи компания мижозларига таксидан фойдаланиш учун ҳар ой субсидиялар тақдим этилади. Бундан ташқари, Uber май ойида ҳайдовчисиз ҳаракатлана оладиган ўзининг илк автомобили суратларини намойиш этган эди.