Янги “УАЗ Патриот” ҳақидаги тафсилотлар пайдо бўлди

Интернет тармоғида Ульяновск автозаводида ишлаб чиқариладиган янги йўлтанламаснинг барча тафсилотларини ўз ичига олган тақдимот пайдо бўлди. Бу ҳақда auto.mail.ru нашри хабар бермоқда.

Маълумотларга кўра, янгиланган “УАЗ Патриот” янги олд панель, ёруғликни бошқариш блоки ва руль ости ўтказгич тугмаларига эга бўлади. Шунингдек, асбоблар панели энди яшил эмас, балки оқ рангдаги орт ёритиш фонида бўлиши мумкин.

Янги “Патриот”да уч спицали руль, олд қисмдаги хавфсизлик ёстиқлари (ҳайдовчи ва йўловчи учун), хавфсизлик камарларини таранглаш механизми, климат-контроль ва руль колонкасини икки хил йўналишда созлаш тизими пайдо бўлади.

Шу билан бирга, автомобиль ташқи таъсирларга қарши тизим ва катта ёнилғи баки билан таъминланади. Орқа ғилдираклар орасидаги дифференциал блоки ҳам кучайтирилиши тўғрисида хабарлар тарқалган. Бироқ слайдда у ҳақда ҳеч қанақа тафсилот мавжуд эмас. Янги версиядаги  “Патриот”ни янги радиатор панжараси ва йирикроқ логотип орқали фарқлаш мумкин бўлади. Автомобиль Россияда сентябрь ойининг охирида сотувга чиқарилиши кутилмоқда.