Йирик компаниялар “ҳайдовчисиз коалиция” атрофида бирлашди

Иттифоқнинг номи Self-Driving Coalition for Safer Streets (Хавфсиз йўл учун ҳайдовчисиз коалиция). The Verge хабарига кўра, иттифоқнинг пировард мақсади автоном автомобилларни жамоатчилик ва сиёсий доираларда оммалаштиришдир. Ford ва Volvo каби автокорхоналар, Uber ва Lyft киракашлик хизматлари коалиция таркибига кирди.

Коалиция етакчиси Дэвид Стрикленд йўл ҳаракат хавфсизлиги бўйича Миллий маъмуриятнинг собиқ раҳбари бўлган. Стрикленд ҳайдовчисиз автомобиллар жорий этилса, Қўшма штатлар йўллари хавфсизроқ бўлиши ва тиғизликлар камайишини айтиб ўтди.

“Ушбу инновацияни ҳаётга татбиқ қилишнинг энг тўғри йўли пухта ва ягона федерал стандартлар жорий этишдир. Бизинг коалиция масъул шахслар билан ҳамкорлик қилади ва ҳайдовчисиз автомобилларни ривожлантиришнинг энг маъқул йўлларини излайди”, деб айтди Дэвид Стрикленд.

Эслатиб ўтамиз: иттифоққа аъзо барча компанияларнинг автоном машина яратиш бўйича озми-кўпми тажрибаси бор. Google 2009 йилдан бери АҚШда автоном автомобилларни синамоқда. Volvo 2017 йилдан Гётеборг кўчаларига 100та автоном автомобилни чиқармоқчи. Ford Мичиганда ўз инновацион автомобилларни синаб кўрмоқда. Uber бу технологияни ўз хизматида қўлламоқчи. Lyft эса ҳайдовчисиз автомобиллар паркини барпо этиш бўйича General Motors билан келишиб олди.