Bentley’да сериялаб ишлаб чиқариладиган йўлтанламас пайдо бўлди

Bentley компанияси ўз тарихидаги илк сериялаб ишлаб чиқариладиган йўлтанламасни расман намойиш этди. Модель Bentayga деб ном олган. Моделнинг оммавий намойиши сентябрь ойи ўрталарида, Франкфурт автосалонида бўлиб ўтади, 2016 йил бошида эса савдога чиқарилиши кутилмоқда.

Британияликлар мазкур автомобилни «жаҳондаги энг кучли, энг бақувват, энг ҳашаматли ва энг эксклюзив йўлтанламас» деб атамоқда. Bentayga’га иш ҳажми олти литр бўлган янги W12 твин-турбо двигатель ўрнатилган. Юклама даражаси паст бўлган ҳолатларда олти цилиндрни ўчириб қўйиш тизими билан таъминланган мотор 608 от кучига эга.

Bentayga

Двигатель ZF’нинг саккиз босқичли автомат узатмалар қутиси билан ҳамоҳангликда ишлайди. Bentley’нинг биринчи йўлтанламаси 4,1 сонияда соатига 100 километр тезликка эриша олади. Моделнинг энг юқори тезлиги соатига 301 километрга тенг.

Bentayga’нинг габарит узунлиги 5141, кенглиги 1998 ва баландлиги 1742 миллиметрга, ғилдираклари базаси эса 2992 миллимтерга тенг. Модель сўнгги авлод Audi Q7га нисбатан 89 миллиметрга узунроқ, 30 миллиметрга кенгроқ ва бир миллиметрга баландроқ. Айни вақтда, икки ўқ оралиғидаги масофа фарқи немис машинаси фойдасига икки миллиметрни ташкил этади.

Bentayga

Bentley’нинг йўлтанламаси шассиси саккиз хил иш тартибида — тўрт соз йўл ҳолатида ва тўртта йўлсиз ҳолатда ишлай олади. Соз йўл ҳолатидаги иш тартибларининг дастлабки учтаси — Sport, Comfort ва Bentley (Sport ва Comfort’ни ўзида жам қилган) олдиндан ўрнатилган, тўртинчи тартиб эса дастурланадиган вариантдир. Йўлсиз ҳолатлар учун Bentayga’да Snow & Grass (сирпанчиқ қопламалар учун), Dirt & Gravel (лой сатҳлар учун), Mud & Trail (темир изларда) ва Sand Dunes (қумда ҳаракатланиш учун) режимлари бор.

Bentley Bentayga’га, шунингдек, панорамали том, тунги кўриш тизими, проекцион дисплей, олти дюймли тачскрин ва 60 гигабайт қаттиқ диски бор мультимедиа тизими, шунингдек, асосий чироқнинг ёруғлик диодли фаралари билан таъминланган.

Bentayga

Автомобиль интерьерида чарм, шунингдек, қўлда тайёрланган ёғоч ва металл безаклаш элементларидан фойдаланилган. Буюртмачининг истагига кўра, Bentley’нинг дастлабки йўлтанламаси ё тўрт, ё беш ўринли қилиб жиҳозланиши мумкин.

Моделнинг олдинги ўриндиқларини тартибга келтириш бўйича 22 хил вариант бор. Бундан ташқари, у иситиш, шамоллатиш тизими ҳамда олти режимли массаж қилиш функцияси билан таъминланган. Агар йўлтанламас тўрт ўринли қилиб жиҳозланса, орқа ўриндиқларда ҳам шамоллатиш ва массаж қилиш тизимлари бўлади. Бундан ташқари, иккинчи қатор йўловчилари ихтиёрида диагонали 10,2 дюймга тенг, ечиб олса бўладиган планшет компьютерлар бўлади.

Bentayga

Аввалроқ Bentley’нинг илк йўлтанламас автомобили Испаниянинг Гран-Канария оролидаги қоя шарафига номлангани маълум қилинган эди.