“Акура” карбон кузовли NSX суперкарини намойиш этди
Acura компанияси кузови тўлиқ карбонли ва бўялмаган NSX GT3 пойга купесининг суратларини эълон қилди. Автомобилнинг тақдимоти 2016 йил мартида Нью-Йоркдаги моторшоуда бўлиб ўтган эди.
Ҳозирги вақтда Acura пойгага мўлжалланган NSX модели устидаги ишларни АҚШдаги Honda Performance Development автоспорт бўлинмаси билан ҳамкорликда давом эттирмоқда. Автомобиль АҚШ, Европа ва Японияда синовдан ўтказилмоқда. Машина куз охирида тайёр ҳолга келиши айтилмоқда. У 2017 йилда Шимолий Америкадаги кузовли пойга чемпионатларида қатнашиши мумкин бўлади.
NSX’нинг оддий, фуқаролар учун чиқариладиган версиясига гибрид двигатель ўрнатилади, пойгачилар учун мўлжалланган варианти эса ҳажми 3,5 литрли, цилиндрлари сони олтита бўлган твин-турбо ва олти босқичли секвенталь тезлик узатмалар қутиси билан таъминланади.
Сериялик ишлаб чиқариладиган Acura NSX’нинг тақдимоти 2015 йил январида бўлиб ўтган эди. V6 мотор билан бирга, суперкар учта электромотор ва тўққиз босқичли узатмалар қутисига эга бўлади. Машина 3,6 сония ичида соатига 100 километрлик тезликка эришади, энг юқори тезлиги соатига 307 километр билан чекланган.
NSX купеси Acura томонидан АҚШда ишлаб чиқарилаётган энг қиммат автомобилга айланади — комплектациясига қараб, автомобиль нархи 156 минг доллардан 205,7 минг долларгача фарқланади.