Ferrari бирданига иккита янги авторусумни намойиш қилди
Париж автосалонига оид янгиликларимизни давом эттирамиз. Тулпор рамзига эга италиялик автомобилсозлар кўргазмага LaFerrari Aperta фахрий гиперкарининг очиқ версиясини ва GTC4Lusso T хэтчбекини келтирди. LaFerrari Aperta тахланувчи юмшоқ томли ва карбонпластикдан ишланган қаттиқ томли вариантларда тайёрланганлиги эътиборга моликдир.
Инженерлар кузовнинг тахланувчанлиги купенинг кўрсаткичларини пасайтирмайди, демоқда. Машина углерод-керамика дискли тормозларга эгадир. LaFerrari Aperta гиперкарининг баҳоси эълон қилинмади, аммо миллион евродан ошиши турган гап.
Ферраричиларнинг уч эшикли GTC4Lusso T хэтчбекини кўрган зийрак томошабин: “Қанақасига? Ахир бу Женевада намойиш этилган-ку”, дейиши тайин. Бироқ номининг охиридаги Т ҳарфига диққат қилинг. Қолаверса, хэтчбек кўрсаткичлари билан ҳам “ака”сидан фарқланади. Юз тезликка 3,4 сонияда чиқади. Максимал тезлиги эса соатига 320 км.