Самолёт-машина Bloodhound соатига 1600 км тезлик билан рекорд ўрнатмоқчи

Bloodhound SSC автомобилининг конструкторлари, ниҳоят, синов ўтказишга тайёрликлари тўғрисида ахборот беришди.

Bloodhound SSC (SuperSonic Car) товушдан тез юрадиган автомобиль бўлиб, 2008 йилдан бери британиялик инженерлар лойиҳа устида ишлаб келмоқда. Улар 2015 йилда машинани битириб синовни бошламоқчи бўлган, аммо афтидан бу кун энди етиб келган кўринади.

Автомобилга уч двигатель ўрнатилади: ракетанинг гибрид двигатели, Eurofighter Typhoon қирувчи самолётининг Eurojet EJ200 реактив двигатели ва Jaguarга тегишли 8 цилиндрли V-симон бензинли двигатель. Машинада ракета ва автомобилнинг қуввати мужассамлашган.

…Барчаси 1997 йилнинг 15 октябрида Энди Грин Невада саҳросида Thrust SSC автомобилини соатига 1228 км тезликда бошқариб рекорд ўрнатганидан бошланган. Thrust SSC товуш тезлигидан ўзган биринчи автомобиль саналади. Тўғри, бу мақомга 1979 йилда Budweiser Rocket русуми ҳам даъвогарлик қилган, аммо рекорд ҳисобга олинмаган.

Thrust SSC

Budweiser Rocket

2007 йилда Энди Грин ва бир гуруҳ ташаббускор инженерлар аввалги рекордни янгилашга енг шимарди. Қарабсизки, бугун машина синовга тайёр ҳолга келди. Bloodhound SSC суратига қараб учиб кетиши мумкинлигидан хавотир олманг, жамоада автомобиль учиб кетмаслигини назорат қиладиган мутахассис бор.