Швейцариялик талабалар 1,5 сонияда юзга босадиган электромобиль яратди
Янги машина тезлик бўйича дунё рекордини янгилади. Grimsel деб номланган электрли болид 100 км/соат тезликка эришиши учун атиги 1,513 сония кифоя қилди. Тезлик синови Дюбендорфдаги авиабазанинг учиш-қўниш полосасида ўтказилди.
Grimsel электроболиди Швейцариядаги Цюрих олий техника мактаби ва Люцерн амалий фанлар Университети талабалари томонидан тажриба тариқасида ишланган машинадир. Болид “Формула-Талаба” мусобақасида иштирок этиш учун яратилган. Унинг ҳар бир ғилдирагида биттадан электромотори бор. Тўрт электромоторнинг жами қуввати 200 от кучига, айлантириш моменти 1700 Н∙мга тенг.
“Гримзел” болидини ясашда карбонпластикдан кенг фойдаланилганлиги боис вазни атиги 168 кг. Қувватнинг массага нисбати: бир тоннага 1190 от кучи миқдоридадир.
Талабалар бундан ташқари болидга трекшн-контроль тизими (противобуксовочная система) ва тормозланганда энергияни рекуперацияловчи тизим ўрнатган.
Тезланиш олиш бўйича аввалги рекордни Штутгарт талабаси ясаган автомобиль юз тезликка 1,779 сонияда эришиб ўрнатган эди.