«GM Uzbekistan» ишлаб чиқариш ҳажмини 20 фоизга оширмоқчи
«GM Uzbekistan» бир йилда ишлаб чиқариладиган машиналари ҳажмини 250 мингдан 300 мингга оширишни режалаштирмоқда. Бу эса 20 фоизлик ўсиш демакдир. «Ўзэкспомарказ» миллий кўргазмалар мажмуида ўтказилган IX Халқаро саноат ярмаркаси ва кооперация биржаси кўргазма-конференциясида шу ҳақда хабар берилди, деб ёзади Kun.uz.
Тақдимот вақтида «GM Uzbekistan» компаниясининг ишлаб чиқариш салоҳияти ҳақида маълумот берилган.
Айни вақтда компания таркибида 3 та завод мавжуд (Андижондаги «Асака» заводи, Тошкентдаги ва Хоразмдаги заводлар).
Асакадаги заводда «Matiz», «Nexia», «Cobalt», «Lacetti» ва «Spark» автомобиллари йиғилади. Хоразмда эса «Damas», «Labo» ва «Orlando» ишлаб чиқарилмоқда. 2016 йилда янги T250 моделини йиғиш ишларини йўлга қўйиш режалаштирилган.
Режага кўра, бу заводнинг ишлаб чиқариш қуввати йилига 250 мингта автомобилгача оширилади.
Тошкентдаги ишлаб чиқариш корхонасида эса йилига 10 минг дона «Captiva» ва «Malibu» автомобиллари йиғилади.
Хоразмнинг Питнак шаҳридаги заводда йилига 40 минг дона «Damas», «Labo» ва «Orlando» автомобилларини тайёрлаш мўлжалланган.
Aйни вақтда «GM Uzbekistan» таркибидаги корхоналарда 7,5 минг киши фаолият кўрсатади.