Monterey Car Week тарихида сотилган энг қиммат 5 та автомобиль
AutoGuide.com нашри Monterey Car Week ҳафталиклари тарихида сотилган энг қиммат 5 та автомобиль тўғрисида маълумот берди.
5. 1961 Ferrari 250 GT SWB California Spider
1961 йилда тайёрланган ушбу автомобиль 2015 йилда 16,830,000 АҚШ долларига Gooding & Company аукционида сотилган. Бундай моделдан жами 37 дона ишлаб чиқарилган бўлиб, унга 240 от кучига эга 3.0 литр ҳажмдаги двигател ўрнатилган.
4. 1964 Ferrari 250 LM
1964 Ferrari 250 LM автомобили RM Auctions аукционида ўтган йили 17,600,000 АҚШ доллари эвазига ўз соҳибини топган. Бундай автомобиль моделидан жами 32 дона тайёрланган, у 320 от кучига эга 3.3 литр ҳажмдаги V12 мотори билан қувватланган.
3. 1964 Ferrari 275 GTB/C Speciale
Модель 2014 йилда 26,400,000 АҚШ доллари ҳисобига RM Auctions аукционида харид қилинган. 1964 Ferrari 275 GTB/C Speciale мазкур аукцион доирасида сотилган энг қиммат автомобиллардан бири бўлган.
2. 1967 Ferrari 275 GTB/4*S NART Spider
Ушбу модель 2013 йилда RM Auctions аукционида 27,500,000 АҚШ долларига сотилган. Аслида моделни 14-17 миллион АҚШ долларига сотиш режалаштирилган эди, бироқ автомобиль кутилганидан ҳам қимматроққа харид этилади. Бундай моделдан жами 10 дона ишлаб чиқарилган. Автомобиль сотувидан тушган маблағ хайрия мақсадларида ишлатилиши маълум қилинган.
1. 1962 Ferrari 250 GTO Berlinetta
1962 Ferrari 250 GTO Berlinetta модели Bonhams’ Quail Lodge аукционида 2014 йили рекорд даражада — 38,115,000 АҚШ долларига харид қилинган. Шу билан биргаликда у мазкур аукцион тарихида сотилган энг қиммат автомобиль бўлганлиги қайд этилган.